వైసీపీ నేత దువ్వి మహేష్‌తో పాటు జనసేనలో చేరిన నాయకులు, కార్యకర్తలు
మధురవాడ: స్థానిక సంస్థల ఎన్నికల నేపథ్యంలో జీవీఎంసీ 7వ వార్డులో వైఎస్సార్ కాంగ్రెస్ పార్టీకి చెందిన నాయకులు, కార్యకర్తలు జనసేన పార్టీలో చేరారు. వైసీపీ నేత దువ్వి మహేష్‌తో పాటు సుమారు 200 మంది జనసేన పార్టీలో చేరినట్లు పార్టీ వర్గాలు తెలిపాయి.
వార్డు అధ్యక్షుడు దేవర శివ ఆధ్వర్యంలో గురువారం నిర్వహించిన ఈ చేరికల కార్యక్రమంలో భీమిలి నియోజకవర్గ జనసేన పార్టీ ఇన్‌ఛార్జి, పొల్యూషన్ కంట్రోల్ బోర్డు సభ్యుడు సందీప్ పంచకర్ల సమక్షంలో నాయకులు, కార్యకర్తలు జనసేన కండువాలు కప్పుకున్నారు. పార్టీలో చేరిన వారిని జనసేన నాయకులు సాదరంగా ఆహ్వానించారు.
కష్టపడి పనిచేసే వారికి పార్టీలో గుర్తింపు: సందీప్ పంచకర్ల
ఈ సందర్భంగా సందీప్ పంచకర్ల మాట్లాడుతూ, రానున్న రోజుల్లో మరిన్ని చేరికలు జనసేన పార్టీలో జరగనున్నాయని తెలిపారు. పార్టీ కోసం కష్టపడి పనిచేసే నాయకులు, కార్యకర్తలకు తప్పకుండా గుర్తింపు లభిస్తుందని పేర్కొన్నారు.
పార్టీపై నమ్మకంతో జనసేనలో చేరిన ప్రతి నాయకుడు, కార్యకర్త కూటమి అభ్యర్థుల విజయానికి కృషి చేయాలని సూచించారు. ఈ కార్యక్రమంలో జనసేన నాయకులు, కార్యకర్తలు పాల్గొన్నారు.
