అమరావతి/ఉండవల్లి: విరాట్ విశ్వకర్మ భగవానుడి జయంతి సందర్భంగా ఆంధ్రప్రదేశ్ ముఖ్యమంత్రి నారా చంద్రబాబు నాయుడు, మంత్రి నారా లోకేష్ ఘనంగా నివాళులు అర్పించారు.
ముఖ్యమంత్రి చంద్రబాబు తన క్యాంపు కార్యాలయంలో విశ్వకర్మ భగవానుడి చిత్రపటానికి పుష్పాలు సమర్పించారు. ఈ సందర్భంగా రాష్ట్ర ప్రజలు సుఖసంతోషాలతో, సుభిక్షంగా ఉండాలని ప్రార్థించారు.
విశ్వకర్మ భగవానుడికి మంత్రి లోకేష్ నివాళులు
ఉండవల్లిలో మంత్రి నారా లోకేష్ విశ్వకర్మ భగవానుడి చిత్రపటానికి పూలమాల వేసి ఘనంగా నివాళులు అర్పించారు. భక్తిశ్రద్ధలతో విశ్వకర్మ భగవానుడిని స్మరించుకున్నారు.
ఈ సందర్భంగా శిల్పులు, వృత్తి నిపుణులు, కార్మికులు, సమాజ నిర్మాణంలో కీలక పాత్ర పోషిస్తున్న నైపుణ్య కార్మికులకు మంత్రి లోకేష్ విశ్వకర్మ జయంతి శుభాకాంక్షలు తెలిపారు.
నైపుణ్యం, సృజనాత్మకత, కష్టపడి పనిచేసే తత్వానికి విశ్వకర్మ భగవానుడు ప్రతీకగా నిలుస్తారని మంత్రి పేర్కొన్నారు. సమాజ అభివృద్ధిలో వృత్తి నిపుణులు, కార్మికుల పాత్ర ఎంతో కీలకమని తెలిపారు.
విశ్వకర్మ జయంతి సందర్భంగా రాష్ట్రవ్యాప్తంగా పలుచోట్ల ప్రత్యేక కార్యక్రమాలు నిర్వహిస్తున్నారు. విశ్వకర్మ భగవానుడిని భక్తిశ్రద్ధలతో పూజిస్తూ ప్రజలు వేడుకలు జరుపుకుంటున్నారు.
