దుబాయ్ నుంచి టెల్ అవీవ్‌కు వెళ్తున్న ఫ్లైదుబాయ్ విమానంలో జరిగిన తీవ్ర ఘటన కలకలం రేపుతోంది. విమానం కాక్‌పిట్‌లో కో-పైలట్ హమామ్ అల్-హమ్మామీ క్రాష్ యాక్స్‌తో కెప్టెన్‌పై దాడి చేసి, విమానాన్ని తన నియంత్రణలోకి తీసుకుని కూల్చేందుకు ప్రయత్నించినట్లు ఆరోపణలు ఉన్నాయి.
దాడిలో పైలట్ తీవ్రంగా గాయపడినప్పటికీ, పరిస్థితిని చాకచక్యంగా ఎదుర్కొని కాక్‌పిట్ తలుపు తెరవడంతో ప్రయాణికులు, సిబ్బంది లోపలికి చేరుకుని కో-పైలట్‌ను అదుపులోకి తీసుకున్నట్లు సమాచారం. అనంతరం విమానాన్ని సౌదీ అరేబియాలోని తబూక్‌లో అత్యవసరంగా ల్యాండ్ చేశారు.
ఈ ఘటనపై యూఏఈ అధికారులు దర్యాప్తు చేపట్టారు. 29 ఏళ్ల ఒమన్ జాతీయుడైన అల్-హమ్మామీని సౌదీ అరేబియాలో అదుపులోకి తీసుకున్న అనంతరం యూఏఈకి తరలించారు. విమానాన్ని కూల్చివేయాలనే ఉద్దేశంతోనే దాడి చేసినట్లు విచారణలో అతను అంగీకరించినట్లు నివేదికలు పేర్కొంటున్నాయి.
ఈ ఘటనను యూఏఈ అధికారులు అత్యంత తీవ్రమైన ఉగ్రవాద చర్యగా పరిగణిస్తున్నట్లు సమాచారం. విమాన ప్రయాణికుల ప్రాణాలకు ముప్పు కలిగించేలా వ్యవహరించిన నిందితుడికి అత్యంత కఠినమైన శిక్షగా మరణశిక్ష విధించాలని యూఏఈ ప్రాసిక్యూటర్లు కోరుతున్నట్లు తెలుస్తోంది. ఈ కేసు దర్యాప్తులో ఇజ్రాయెల్ అధికారులు కూడా సహకరిస్తున్నట్లు సమాచారం.
