తిరుమల: అఖిలాండ కోటి బ్రహ్మాండ నాయకుడు తిరుమల శ్రీ వేంకటేశ్వరస్వామి సాలకట్ల బ్రహ్మోత్సవాల్లో మంత్రి నారా లోకేష్ కుటుంబ సభ్యులతో కలిసి పాల్గొన్నారు. మంగళవారం సాయంత్రం తిరుమలకు చేరుకున్న మంత్రి లోకేష్.. ముందుగా కుటుంబ సభ్యులతో కలిసి బేడి ఆంజనేయస్వామిని దర్శించుకున్నారు.
అనంతరం మంగళవాయిద్యాల నడుమ శ్రీవారి ఆలయానికి చేరుకున్నారు. ఈ సందర్భంగా ఆలయ అధికారులు మంత్రి లోకేష్, కుటుంబ సభ్యులకు ఘన స్వాగతం పలికారు.
స్వామివారికి పట్టువస్త్రాలు సమర్పించిన సీఎం
తిరుమల శ్రీవారి బ్రహ్మోత్సవాలను పురస్కరించుకుని రాష్ట్ర ప్రభుత్వం తరఫున ముఖ్యమంత్రి నారా చంద్రబాబునాయుడు, భువనేశ్వరి దంపతులు శ్రీవారికి పట్టువస్త్రాలు సమర్పించారు. అనంతరం సీఎం చంద్రబాబు దంపతులతో పాటు మంత్రి నారా లోకేష్, ఆయన సతీమణి నారా బ్రాహ్మణి, ఇతర కుటుంబ సభ్యులు స్వామివారిని దర్శించుకున్నారు.
కుటుంబ సభ్యులకు వేదాశీర్వచనం
దర్శనం అనంతరం రంగనాయకుల మండపంలో చంద్రబాబు కుటుంబ సభ్యులకు పండితులు వేదాశీర్వచనం అందించారు. టీటీడీ అధికారులు స్వామివారి తీర్థప్రసాదాలను అందజేశారు.
ఈ సందర్భంగా 2027 టీటీడీ డైరీ, క్యాలెండర్‌ను సీఎం చంద్రబాబు ఆవిష్కరించారు.
పెద్దశేష వాహనసేవలో పాల్గొన్న లోకేష్
అనంతరం సీఎం చంద్రబాబు, మంత్రి లోకేష్ కుటుంబ సభ్యులు ఆలయం ముందు ఉన్న వాహన మండపానికి చేరుకున్నారు. అక్కడ జరిగిన పెద్దశేష వాహనసేవలో పాల్గొన్నారు. పెద్దశేష వాహనంపై కొలువుదీరిన శ్రీ మలయప్ప స్వామివారిని దర్శించుకున్నారు.
ఈ కార్యక్రమంలో మంత్రులు ఆనం రామనారాయణ రెడ్డి, అనగాని సత్యప్రసాద్, టీటీడీ బోర్డు ఛైర్మన్ బీఆర్ నాయుడు, టీటీడీ ఈవో ముద్దాడ రవిచంద్ర, అదనపు ఈవో సీహెచ్ వెంకయ్య చౌదరి, టీటీడీ బోర్డు సభ్యులు, పలువురు ఎమ్మెల్యేలు పాల్గొన్నారు.
