విశాఖపట్నం: దేశ రక్షణ రంగంలో హిందుస్థాన్ షిప్‌యార్డ్ లిమిటెడ్ (HSL) కీలక పాత్ర పోషిస్తోందని రక్షణ మంత్రి రాజ్‌నాథ్ సింగ్ అన్నారు. విశాఖపట్నంలోని హెచ్‌ఎస్‌ఎల్‌లో నూతన స్లిప్‌వేతో పాటు ఫ్లీట్ సపోర్ట్ షిప్ (FSS-1)ను ఆయన ప్రారంభించారు.
ఈ సందర్భంగా రాజ్‌నాథ్ సింగ్ మాట్లాడుతూ.. పురాతన కాలం నుంచి నౌకాయానం ద్వారా వాణిజ్యం కొనసాగుతోందని, హిందుస్థాన్ షిప్‌యార్డ్ మారిటైమ్ కస్టోడియన్‌గా కీలక సేవలు అందిస్తోందని పేర్కొన్నారు. నావల్ డాక్‌యార్డ్, హిందుస్థాన్ షిప్‌యార్డ్ నౌకల నిర్వహణలో కీలకంగా పనిచేస్తున్నాయని తెలిపారు.
దేశ రక్షణతో పాటు సముద్ర జలాల పరిరక్షణకు నిబంధనలకు అనుగుణంగా చర్యలు తీసుకుంటున్నామని చెప్పారు. హిందుస్థాన్ షిప్‌యార్డ్‌లోని కీల్ కేవలం నౌకా నిర్మాణ ప్రక్రియ మాత్రమే కాదని, దేశ రక్షణ సామర్థ్యాన్ని మరింత బలోపేతం చేసే మార్గమని రాజ్‌నాథ్ సింగ్ అన్నారు.
దేశ మారిటైమ్ రంగానికి ఏపీ ప్రభుత్వం సహకరిస్తోందని, సీఎం చంద్రబాబు సహకారం బాగుందని పేర్కొన్నారు. ప్రధాని నరేంద్ర మోదీ ఆశయాలకు అనుగుణంగా 2047 నాటికి వికసిత్ భారత్ లక్ష్యాన్ని సాధించాలని ఆకాంక్షించారు.
ఈ కార్యక్రమంలో రాష్ట్ర మంత్రి బీసీ జనార్దన్‌రెడ్డి, ఎంపీ శ్రీభరత్‌తో పాటు నౌకాదళ ఉన్నతాధికారులు పాల్గొన్నారు.
