గిరిజన యువతకు సివిల్ సర్వీసెస్ కోచింగ్ మూడో బ్యాచ్ ప్రారంభం

AP TODAY

October 14, 2026

పాడేరు, అక్టోబర్ 14: అల్లూరి సీతారామరాజు జిల్లాకు చెందిన గిరిజన యువతను ఉన్నత ప్రభుత్వ సేవల్లోకి ప్రోత్సహించే లక్ష్యంతో విశాఖపట్నంలోని వేపగుంట YTCలో సివిల్ సర్వీసెస్ కోచింగ్ మూడో బ్యాచ్‌ను జిల్లా కలెక్టర్ టి. నిశాంతి, ఐఏఎస్ బుధవారం ప్రారంభించారు. ఈ శిక్షణ కార్యక్రమం 11 నెలల పాటు కొనసాగనుంది.

ఈ సందర్భంగా కలెక్టర్ మాట్లాడుతూ, సివిల్ సర్వీసెస్‌లో విజయం సాధించాలంటే క్రమశిక్షణ, పట్టుదల, నిరంతర సాధన, ఆత్మవిశ్వాసం అవసరమని అభ్యర్థులకు సూచించారు. కోచింగ్‌తో పాటు స్వీయ అధ్యయనం, క్రమం తప్పకుండా పునశ్చరణ, నమూనా పరీక్షల విశ్లేషణపై దృష్టి పెట్టాలని తెలిపారు.

పోటీ పరీక్షల్లో ఎదురయ్యే అపజయాలకు నిరుత్సాహపడకుండా, తప్పులను సరిదిద్దుకుంటూ లక్ష్యం వైపు ముందుకు సాగాలని అన్నారు. గిరిజన నేపథ్యం ఉన్నత లక్ష్యాల సాధనకు అడ్డంకి కాకూడదని, అందుబాటులో ఉన్న శిక్షణ, మార్గదర్శకత్వాన్ని సద్వినియోగం చేసుకోవాలని సూచించారు.

సివిల్ సర్వీసెస్ అనేది కేవలం ఉద్యోగం మాత్రమే కాదని, ప్రజలకు సేవ చేసే గొప్ప అవకాశమని కలెక్టర్ పేర్కొన్నారు. ఈ కార్యక్రమంలో ఐటీడీఏ పాడేరు ప్రాజెక్టు అధికారి, ఇతర అధికారులు పాల్గొన్నారు.

Published By : Nataraj Cherukuri