బ్యాంకుల్లో కరపత్రాలతో ప్రచారం.. సెప్టెంబర్ 11న సమ్మెకు ప్రత్యక్ష మద్దతు
పరవాడ: బ్యాంకు ఉద్యోగుల సమస్యల పరిష్కారానికి, ఇప్పటికే కుదిరిన ఒప్పందాలను ఆమోదించాలని కోరుతూ సెప్టెంబర్ 11న చేపట్టనున్న బ్యాంకు ఉద్యోగుల సమ్మెకు సీఐటీయూ సంపూర్ణ మద్దతు ప్రకటించింది. సమ్మెలో ప్రత్యక్షంగా పాల్గొని ఉద్యోగుల డిమాండ్ల పరిష్కారానికి తమ వంతు కృషి చేస్తామని సీఐటీయూ జిల్లా నాయకులు గని శెట్టి సత్యనారాయణ తెలిపారు.
ఈ సందర్భంగా పరవాడ మండలంలోని వివిధ బ్యాంకుల్లో గురువారం ఉదయం నుంచి సీఐటీయూ నాయకులు కరపత్రాలను పంపిణీ చేసి, బ్యాంకు ఉద్యోగుల సమ్మెకు మద్దతు తెలిపారు.
ఐదు రోజుల బ్యాంకింగ్ను అమలు చేయాలి
గని శెట్టి సత్యనారాయణ మాట్లాడుతూ.. బ్యాంకు యూనియన్లు ఇచ్చిన పిలుపు మేరకు జరిగే ఈ సమ్మెలో వాణిజ్య బ్యాంకులతో పాటు గ్రామీణ బ్యాంకుల ఉద్యోగులు కూడా పాల్గొనడం అభినందనీయమన్నారు. వారానికి ఐదు రోజుల బ్యాంకింగ్ విధానానికి సంబంధించి కుదిరిన ఒప్పందాన్ని కేంద్ర ప్రభుత్వం ఆమోదించాలని డిమాండ్ చేశారు.
ఉద్యోగులందరికీ ప్రయోజనాలు కల్పించాలి
కుదిరిన ఒప్పందం ప్రకారం బ్యాంకులు సాధించిన ఫలితాల ఆధారంగా కింది స్థాయి నుంచి పై స్థాయి వరకు పనిచేసే ఉద్యోగులందరికీ పీఆర్ఏ బెనిఫిట్ అమలు చేయాలనే డిమాండ్ ఉందన్నారు. అయితే ఈ ప్రయోజనాలను కొంతమంది ఉన్నతస్థాయి అధికారులకు మాత్రమే పరిమితం చేసి, మిగిలిన 95 శాతం మంది ఉద్యోగులను ఈ పథకం నుంచి తొలగించే విధంగా కేంద్ర ప్రభుత్వం నిర్ణయాలు తీసుకోవడాన్ని సీఐటీయూ తీవ్రంగా ఖండిస్తోందన్నారు.
ఉద్యోగుల మధ్య విభజన తీసుకురావడాన్ని అంగీకరించకుండా, ఐక్యతను కాపాడుకుంటూ సమ్మెను విజయవంతం చేయాలని బ్యాంకు ఉద్యోగులకు పిలుపునిచ్చారు.
బ్యాంకుల విలీనం, ప్రైవేటీకరణను వ్యతిరేకించాలి
మరిన్ని బ్యాంకులను విలీనం చేయడం, ప్రైవేటీకరణ చర్యలు చేపట్టడం వంటి కేంద్ర ప్రభుత్వ విధానాలను వ్యతిరేకించాల్సిన అవసరం ఉందన్నారు. కార్పొరేట్ సంస్థలు బ్యాంకులకు చెల్లించాల్సిన బకాయిలను ఎగ్గొట్టే పరిస్థితులకు వ్యతిరేకంగా పోరాడాల్సిన అవసరం ఉందని పేర్కొన్నారు.
బ్యాంకు ఉద్యోగులు, ఇతర కార్మికులు ఐక్యంగా పోరాడి కేంద్ర ప్రభుత్వ విధానాలను తిప్పికొట్టాలని గని శెట్టి సత్యనారాయణ అన్నారు. సెప్టెంబర్ 11న జరిగే బ్యాంకు ఉద్యోగుల సమ్మెలో సీఐటీయూ ప్రత్యక్షంగా పాల్గొని ఉద్యోగుల డిమాండ్ల పరిష్కారానికి కృషి చేస్తుందని తెలిపారు.
ఈ కార్యక్రమంలో సీఐటీయూ నాయకులు పెంటారావు, వెంకట్రావు తదితరులు పాల్గొన్నారు.
