విజయవాడ:ఆంధ్రప్రదేశ్ రాజకీయాల్లో మరో కొత్త రాజకీయ అధ్యాయానికి తెరలేచింది. వైసీపీ మాజీ రాజ్యసభ సభ్యుడు విజయసాయిరెడ్డి కొత్త రాజకీయ పార్టీ ఏర్పాటు చేయనున్నట్లు ప్రకటించారు. విజయవాడలో నిర్వహించిన ప్రెస్‌మీట్‌లో తన రాజకీయ భవిష్యత్ కార్యాచరణతో పాటు కొత్త పార్టీ లక్ష్యాలు, ప్రజా సమస్యలు, యువతకు ప్రాధాన్యత, ముఖ్యమంత్రి అభ్యర్థి అంశంపై కీలక వ్యాఖ్యలు చేశారు. కొత్త పార్టీని దసరా నాటికి ప్రకటించే అవకాశం ఉందని తెలిపారు.
 1. కొత్త రాజకీయ పార్టీ ఏర్పాటు
విజయసాయిరెడ్డి త్వరలో ఆంధ్రప్రదేశ్‌లో కొత్త రాజకీయ పార్టీని ఏర్పాటు చేయనున్నట్లు ప్రకటించారు. ప్రజా సమస్యలను ప్రధాన అజెండాగా తీసుకుని రాజకీయాల్లో కొత్త మార్గాన్ని చూపించడమే తమ లక్ష్యమని తెలిపారు. దసరా సమయంలో పార్టీకి సంబంధించిన కీలక ప్రకటన చేసే అవకాశం ఉందని చెప్పారు.
2. టీడీపీ–వైసీపీకి మూడో ప్రత్యామ్నాయం
రాష్ట్ర రాజకీయాల్లో ప్రస్తుతం ప్రధానంగా టీడీపీ, వైసీపీ చుట్టూనే రాజకీయ పోటీ ఉందని పేర్కొంటూ.. ప్రజలకు మూడో ప్రత్యామ్నాయం అవసరమని విజయసాయిరెడ్డి అన్నారు. కొత్త పార్టీ ప్రజల సమస్యలను నేరుగా ప్రస్తావించే వేదికగా ఉండాలని లక్ష్యంగా పెట్టుకున్నట్లు తెలిపారు.
3. తాను సీఎం అభ్యర్థిని కాదన్న విజయసాయిరెడ్డి
కొత్త పార్టీ ఏర్పాటులో తానే ముఖ్యమంత్రి అభ్యర్థిని అని ఎక్కడా చెప్పడం లేదని స్పష్టం చేశారు. సామర్థ్యం, అనుభవం ఉన్న వ్యక్తి ఏ సామాజిక వర్గానికి చెందిన వారైనా ముఖ్యమంత్రి కావచ్చని తెలిపారు. తాను మార్గదర్శకుడిగా, మెంటర్‌గా వ్యవహరించే అవకాశం ఉందని చెప్పారు.
 4. యువతకు 66 శాతం ప్రాధాన్యత
కొత్త పార్టీలో 25 నుంచి 40 ఏళ్లలోపు యువతకు భారీ ప్రాధాన్యత ఇవ్వనున్నట్లు ప్రకటించారు. 2029 నాటికి పార్టీ పదవులు, అవకాశాల్లో సుమారు 66 శాతం యువతకు కేటాయించాలని భావిస్తున్నట్లు తెలిపారు. రాజకీయాల్లో యువతకు ఎక్కువ అవకాశాలు కల్పించాలన్నదే తమ ఉద్దేశమని చెప్పారు.
 5. పెట్రోల్–డీజిల్ ధరలు తగ్గించాలి
సామాన్య ప్రజలపై పెరుగుతున్న ఆర్థిక భారాన్ని తగ్గించడంలో భాగంగా పెట్రోల్, డీజిల్ ధరలను తగ్గించాల్సిన అవసరం ఉందని విజయసాయిరెడ్డి అన్నారు. ఇంధన ధరలు తగ్గితే రవాణా ఖర్చులు తగ్గి.. నిత్యావసర వస్తువుల ధరలపై కూడా ప్రభావం పడుతుందని ఆయన అభిప్రాయపడ్డారు.
 6. ఉచిత విద్యుత్ కోసం సోలార్ విద్యుత్
ఇళ్లకు, వ్యవసాయానికి అవసరమైన విద్యుత్‌ను సోలార్ పవర్ ద్వారా అందించే విధానంపై ఆయన దృష్టి పెట్టారు. సౌర విద్యుత్ ఉత్పత్తిని పెంచడం ద్వారా విద్యుత్ ఖర్చును తగ్గించడంతో పాటు రైతులకు, సామాన్య ప్రజలకు ప్రయోజనం కల్పించవచ్చని తెలిపారు.
 7. సాగునీటి ప్రాజెక్టులకు ప్రాధాన్యత
ఆంధ్రప్రదేశ్‌లో సాగునీటి ప్రాజెక్టులను వేగంగా పూర్తి చేయాల్సిన అవసరం ఉందని విజయసాయిరెడ్డి పేర్కొన్నారు. రైతులకు నీటి భద్రత కల్పించడం, వ్యవసాయ రంగాన్ని బలోపేతం చేయడం కొత్త రాజకీయ అజెండాలో కీలక అంశంగా ఉండాలని తెలిపారు.
 8. లోన్ యాప్ వేధింపులకు చెక్
లోన్ యాప్‌ల ద్వారా అప్పులు తీసుకున్న ప్రజలు ఎదుర్కొంటున్న వేధింపులపై కూడా ఆయన స్పందించారు. అప్పుల కారణంగా ప్రజలు ఇబ్బందులు పడకుండా కఠినమైన నియంత్రణ అవసరమని చెప్పారు. ముఖ్యంగా ఆర్థికంగా బలహీన వర్గాలను రక్షించాల్సిన అవసరం ఉందని పేర్కొన్నారు.
9. నిత్యావసరాల ధరల భారాన్ని తగ్గించాలి
ధరల పెరుగుదల వల్ల సామాన్య కుటుంబాలపై ఆర్థిక భారం పెరుగుతోందని విజయసాయిరెడ్డి అన్నారు. ప్రజల జీవన వ్యయాన్ని తగ్గించే విధానాలు ప్రభుత్వాలు అమలు చేయాలని సూచించారు. కుటుంబాల అప్పుల భారం తగ్గించడంపైనా దృష్టి పెట్టాలని చెప్పారు.
 10. విద్యార్థులు, ఉపాధ్యాయులపై భారం తగ్గించాలి
విద్యా రంగంలో విద్యార్థులు, ఉపాధ్యాయులు ఎదుర్కొంటున్న సమస్యలను పరిష్కరించాల్సిన అవసరం ఉందని తెలిపారు. ప్రభుత్వ పాఠశాలలను బలోపేతం చేయాలని, విద్యా వ్యవస్థలో నాణ్యత పెంచాలని పేర్కొన్నారు.

11.APPSC & DSC పై CBI దర్యాప్తు డిమాండ్
ఉద్యోగ నియామక ప్రక్రియలకు సంబంధించిన ఆరోపణలపై CBI దర్యాప్తు జరపాలని విజయసాయిరెడ్డి డిమాండ్ చేశారు. నిరుద్యోగ యువతలో నమ్మకం పెంచేందుకు నియామక ప్రక్రియ పారదర్శకంగా ఉండాల్సిన అవసరం ఉందని ఆయన పేర్కొన్నారు.
 12. అమరావతిపై కీలక వ్యాఖ్యలు
అమరావతికి తాను వ్యతిరేకం కాదని విజయసాయిరెడ్డి స్పష్టం చేశారు. ఇప్పటికే భారీగా ఖర్చు జరిగిన నేపథ్యంలో రాజధాని అభివృద్ధిని ముందుకు తీసుకెళ్లాలని అన్నారు. ప్రైవేట్ పెట్టుబడులను ఆకర్షించి అమరావతిని అభివృద్ధి చేయాలని సూచించారు.
13. ప్రభుత్వ నిధుల వినియోగంపై ప్రశ్న
ప్రజల డబ్బును జాగ్రత్తగా వినియోగించాల్సిన అవసరం ఉందని ఆయన పేర్కొన్నారు. భారీ ప్రాజెక్టుల విషయంలో ప్రభుత్వ నిధులు వృథా కాకుండా పెట్టుబడులు, ప్రైవేట్ భాగస్వామ్యాన్ని కూడా పరిగణనలోకి తీసుకోవాలని సూచించారు.
14. రాష్ట్రవ్యాప్తంగా ప్రజా సమస్యలపై పర్యటన
విజయవాడతో పాటు తిరుపతి, అనంతపురం, విశాఖపట్నంలో కూడా వరుసగా మీడియా సమావేశాలు నిర్వహించనున్నట్లు తెలిపారు. ప్రతి ప్రాంతంలో ప్రజలు ఎదుర్కొంటున్న ముఖ్యమైన సమస్యలను గుర్తించి వాటిపై మాట్లాడనున్నట్లు చెప్పారు.
 15. విజయసాయిరెడ్డి రాజకీయ పునరాగమనం
గతంలో రాజకీయాల నుంచి తప్పుకుంటున్నట్లు ప్రకటించిన విజయసాయిరెడ్డి.. ఇప్పుడు కొత్త పార్టీతో మళ్లీ రాజకీయాల్లోకి రావడం కీలక పరిణామంగా మారింది. ఆయనకు ఉన్న రాజకీయ అనుభవం కొత్త పార్టీ నిర్మాణంలో ఎంతవరకు ఉపయోగపడుతుందన్నది చూడాల్సి ఉంది.